廢話少說，入正題：Fans Service 係一定嘅，滴屎嚟最叻係咩？就係希望大家「玩得開心」。
其實都預咗，吹到咁行，歐美嗰邊啲 ig 呀 twitter 呀一早講咗 9 成都一定預咗呢廿年喺大銀幕中演過蜘蛛俠嘅演員都會「回歸」出現喺同一套戲裡面，話冇興奮嘅感覺係呃你嘅，始終真係 #童年回憶返晒嚟 ，廿年前由拍開驚慄鬼片嘅 Sam Raimi 謝一個「陽光正氣 feel」、Tobey Maguire 嘅《Spider-Man》（最正係重用 PlayStation 2 字體）節奏明快嘅情節、角色分明嘅配搭令我深深投入咗（入戲院睇四次睇到識背，再買豪華版 DVD 收藏，電視播親都會睇），亦可以話為呢個最深入民心嘅超級英雄喺大銀幕開咗個靚頭；又因為鍾意自編自導 《(500) Days of Summer》嘅 Marc Webb 而撐佢執導嘅《The Amazing Spider-Man》，當時對 Andrew Garfield 演嘅「失敗的人」感覺係升咗一個 grade，因為無論係劇本、Andrew 嘅演繹都嚟得多咗幾分層次。（個人係 like Marc Webb 嗰套，重睇幾多次都係令我唔想去面對 Gwen Stacy 嘅死，但又咁講，當年漫畫 Gwen Stacy 同一方式死時，迴響大到癲，係標誌美漫嘅黃金時代轉到銀色時代嘅分水嶺。）
以下用「荷蘭SM」、「Tobey SM」及「Andrew SM」分辨三個蜘蛛俠
先唔理荷蘭 SM 其實只要同 Dr. Strange 講「可唔可以令世人忘記 Mysterio 同佢講過嘅嘢？」就搞掂晒，but 呢啲戲從來都係咁～
今次睇喺戲院當然係興奮大叫拍手啦，始終係一次（都可能係唯一一次）幾代蜘蛛俠 + main villains 聚首一堂，所以可以話今次嘅《Spider-Man No Way Home》滴屎嚟係用 Star Wars 新三部曲同一個方式，就係搵番「前作舊人客串」轟起個話題，再喺戲入而用一個「we can fix it」嘅方式去「完整番」兩部前作系列 fans 未圓滿嘅心結，Andrew Garfield 喺五年前嘅 Variety 專題節目《Actors on Actors》度同 Amy Adams 分享自己對演繹「失敗的人」用咗好多心力，到最後無疾而終係直頭 Heart-breaking，所以大家睇到今次戲入而佢對「荷蘭SM」講自己「失去咗 Gwan Stacy」嘅感受，唔係演出嚟，係真真正正為 Andrew 自己對演蜘蛛俠嘅感受抒發，同時可以講係為 TASM fans 作一個少少安慰（例如救番 Zendaya 嗰下）。又雖然， 俾兩個前代蜘蛛俠出場嗰下嘅零氣勢同 hea 嘅感覺真係頂佢個肺。
反而 Tobey SM真係只 for Nostalgia，因為佢嗰系列「未了結」嘢唔多，所以你見 Tobey SM 見番 Doc Ock 係老朋友咁。完場出返嚟，坐巴士到返到去沖涼時，就係無窮嘅唏噓，覺得當年係因為導演、因為劇本同選角去令大家投入，而當年兩次嘅 Spiderman 系列都因為係電影公司 SONY 戇膠膠搞到同導演創作分歧而爛尾（Raimi 蜘蛛俠原本會有第四集講打 Vulture；TASM 原本想開第三集講打 Sinister Six），嚟到今次，可以叫齊咁多人「返嚟」，但靠嘅，唔係導演嘅功力、唔係劇本嘅深度，而係靠一間接近隻手遮天嘅電影公司嘅財雄勢厚，去「請」佢哋返嚟玩大堆頭。
細心再諗返成套 No Way Home「戲」，冇故事主旨（其實三集以嚟都係冇一集有令人深刻嘅主旨）、荷蘭 SM 經過三集主角、幾集其他 MCU 嘅客串，角色繪畫上毫無進展，因為佢其實根本唔係呢套戲嘅重心，從來冇為佢度過任何角色描繪，係呀大家睇到今次 Aunt May 死得好突然，荷蘭 SM 用盡力流眼淚，但都谷唔到任何嘅情緒，因為兩個角色之間咁耐以嚟從來冇 build up 過啲咩，除咗今集兩個對手戲先叫多咗五分鐘（主要係講大愛道理、「要幫人呀」嗰啲嘢）相反你睇舊嘅 Spider-Man，大家記得嘅係 Tobey SM 對 Uncle Ben 之死、死黨 Harry 之死嘅情緒；Andrew SM 直頭唔使講，對 Gwan 之死嘅痛。但荷蘭 SM 呢？你話係對 Iron Man 之死囉… 但 Iron Man 之死唔係只對佢一個有影響… 起碼我對荷蘭SM 嘅印象係片面同零碎… 點解？因為 Tobey SM 同 Andrew SM 係以角色喺套戲入面嘅角度出發，戲係寫緊個人物本身，但去到荷蘭 SM 呢？只不過係搵咗一個人返嚟着起套蜘蛛俠 suit，再俾周圍嘅嘢圍住佢轉，觀眾睇到嘅唔係主角點樣去帶動成套戲，而只係套戲不停塞啲嘢出嚟發生而個主角只係被牽住鼻子走，冇任何一刻你會覺得「個主角決定咗一啲嘢唔知會點、觀眾會為佢擔心會被佢嘅一舉一動牽動情緒」，而呢個，都同套戲上影前嘅宣傳、rumors式嘅鋪天蓋地式報道有關，但呢樣係另一個討論話題。
荷蘭 SM 去到今集，角色依然係空洞冇深度，一嚟我覺得始終係因為 SONY 叫 Marvel Studios 救亡，後者係絕對唔會俾好嘢益 Sony，去到最後仲要「叫人忘記呢個 Peter Parker 係蜘蛛俠」，嘩，俾我感覺係潛台詞式、超諷刺地真正回應 Tony Stark 對荷蘭 SM 嗰句「唔係套 suit 你咩都唔係呀」。堅係 CLS 。Tobey SM 當年可以大大聲同人講「This is my Gift. My Curse. Who am I? I’m Spider-Man」，電影 build up 嘅係 Peter Parker；相反荷蘭 SM 係要攞住張紙仔同人講自己係邊個，首先呢個「啲人忘記晒我」呢個情節好滴屎嚟好老土好 lame 好過時，第二就係我覺得完全有種荷蘭 SM 俾滴屎嚟「用完即棄」嘅感覺。係當頭棒喝講「冇人記得你呀」咁，因為，大家只記得之前嘅兩個蜘蛛俠。(荷蘭 SM 唔係 Marvel Studios 親生仔都係一個主因）
大家會對 Willem Dafoe 嘅演出搶鏡而興奮，其實睇開戲嘅都知佢會搶鏡，我比較失望嘅係，Tobey SM 同 Dafoe 綠魔嘅 interaction 少到咁，好似唔識嘅咁，仲要夾硬 shift 咗去俾荷蘭 SM 個 arch 度…
講咗咁多廢話，都係一句，馬田史高西斯嘅「MCU 絕不是電影，只是一個主題樂園」嘅言論，我係絕對同意嘅。大家玩得開心就好。但大家又唔好太開心住，喺 mid-credit scene 咪見到 Venom 嘅？佢知道晒 MCU 嘅人嘅？但唔好以為會喺 MCU 見到Tom Hardy 同荷蘭 SM 對打，因為 Venom 仲係 SONY 嘅，所以，最後嗰度光吸走佢，係 Dr.Strange 個「忘記 Peter Parker 咒語帶番 Venom 返去 SONY Marvel 宇宙」，咁你會問點算？大家見到留低嗰一細 pat SYMBIOTE 好大機會 MCU 會用佢嚟玩，VENOM? 大家都乖乖地係諗睇 SONY 嗰邊嘅系列吧啦。
最後講埋：今次係首次有 Netflix Marvel 劇集 (Charlie Cox 嘅 DareDevil）角色登陸 MCU 電影，我覺得 Marvel Studios 冇藉口唔帶埋 Jon Bernthal 嘅 Punisher、Krysten Ritter 嘅 Jessica Jones、Mike Colter 嘅 Luke Cage 返嚟啦下化？美國 Marvel fans 快啲開 petition 啦！（Finn Jones 嘅 Iron Fist 就諗諗先，但一定要有 Jessica Henwick 嘅 Colleen Wing！！）
No comments:
Post a Comment